ಸೂರ್ಯ,ಚಂದ್ರ,ತಾರೆಗಳೆಲ್ಲಾ ಇನ್ನೂ ಇವೆಯೇ?!
ಈಗಲೂ ಆಗಸದಿ ಪ್ರತಿದಿನ ಮಿನುಗುವುದೇ..?
ನನಗೀಗ ಅವು ಕೇವಲ ನೆನಪು ಮಾತ್ರ !
ಹಾ..! ಕೇವಲ ನೆನಪುಗಳು ಉಳಿದಿವೆ..!

ಬೆಳಕೆಂದರೆ ನನ್ನ ಪಾಲಿಗೆ ಈ ಬುಡ್ಡಿ ದೀಪ.
ಗಾಳಿ ಎಂದರೆ ಕಾಮುಕರ ಬಿಸಿಯುಸಿರು.
ಮಳೆಯೆಂದರೆ ಅವರ ಬೆವರು , ನನ್ನ ಕಣ್ಣೀರು.
ಜನ ಎಂದರೆ ಮಾತ್ರ ನೆನಪಲ್ಲಿ ಉಳಿದವರು!

`ಇಲ್ಲಿಯೇ ಸ್ವರ್ಗ , ಇಲ್ಲಿಯೇ ನರಕ`
ಇಲ್ಲಿಯೇ ಬಾಳಬೇಕು ಕನಸುಗಳ ಅದುಮಿಕೊಂಡು.
ನನಗೂ ಇವೆ ಭಂಡ ಭಾವನೆಗಳು..!
ಗೋಳು ಕೇಳುವವರು ಯಾರು ? ಶೃಂಗಾರಿಸಿಕೊಳ್ಳಬೇಕು..!?